د طالبانو د سوداګرۍ وزیر د یوه پلاوي په مشرۍ قزاقستان ته ورسېده

د طالبانو د صنعت او سوداګرۍ وزیر، نورالدین عزیزی، د آستانې په نړیوال فورم کې د ګډون لپاره قزاقستان ته تللی دی.

د طالبانو د سوداګرۍ وزارت د چهارشنبې په ورځ په یوه خبرپاڼه کې ویلي چې عزیزی به په دې غونډه کې په افغانستان کې د پانګونې د فرصتونو په اړه وینا وکړي.

په دې سفر کې یو پلاوی هم له عزیزی سره مل دی.

د آستانې نړیوال فورم یوه نړیواله غونډه ده چې پکې د اقتصاد، اقلیمي بدلون، نړیوال امنیت، دوامدار پرمختګ، او سیمه‌ییزو همکاریو په اړه بحث کېږي.

د منځنۍ آسیا له هېوادونو، په ځانګړې توګه له قزاقستان سره، د طالبانو سوداګري او اقتصادي اړیکې په وروستیو کلونو کې د پام وړ پراخې شوي دي. د قزاقستان چارواکو، چې د دغه هېواد د صدراعظم مرستیال هم پکې شامل دی، په تېرو څلورو کلونو کې کابل ته سفرونه کړي او له طالبانو سره یې د سلګونو میلیون ډالرو قراردادونه لاسلیک کړي دي.

په وروستیو کې د قزاقستان د صدراعظم مرستیال سریک ژومانگارین کابل ته د سفر پر مهال د ۵۰۰ میلیون ډالرو پانګونې ژمنه وکړه.

همداراز، د طالبانو اقتصادي مرستیال عبدالغني برادر، د کابل او آستانې ترمنځ درې میلیارده ډالرو ته د سوداګرۍ د لوړولو لپاره د لارې د نقشې د مسودې د لاسلیک خبر ورکړی.

له هغې وروسته چې د طالبانو او پاکستان ترمنځ اړیکې خرابې شوې، د طالبانو حکومت له قزاقستان، ترکمنستان، ازبکستان او روسیې سره خپلې اړیکې پراخې کړي.

دې ته ورته هڅه د افغانستان تېرو حکومتونو وروسته له هغه وکړه چې د پاکستان له لوري نهیلي شول.