طالبان: د ملګرو ملتونو د دفترونو لګښتونه او د کارکوونکو معاشونه لوړ دي
طالبان وايي چې د ملګرو ملتونو د دفترونو لګښتونه او د کارکوونکو معاشونه ډېر لوړ دي
دوی د ملګرو ملتونو او
اروپايي اتحادیې په ګډه غونډه کې دا خبرې کړي دي او ویلي یې دي چې د لوړو معاشونو
تر څنګ یې کارونه هم موثر نه دي.
د طالبانو د اقتصاد وزیر دین محمد حنیف وايي چې
په افغانستان کې د ملګرو ملتونو دفترونو د لوړو اداري لګښتونو او معاشونو له امله
د دې سازمان د پروژو مؤثریت کم شوی دی.
د طالبانو پر لومړیتوبونو ټینګار
د طالبانو د اقتصاد وزیر له ملګرو ملتونو وغوښتلچې په خپلو پروګرامونو کې د دې ډلې لومړیتوبونه په پام کې ونیسي. د دې ترڅنګ دې نویو
جوړو شوو ولسوالیو ته توجه وکړي.
ده له ملګرو ملتونو وغوښتل چې د خپلو پروژو په
اړه له اقتصاد وزارت سره مشوره وکړي او راپور ورکړي.
دین محمد حنیف پرون (سې شنبې) په کابل کې د ملګرو
ملتونو د دفترونو له استازو سره په کتنه کې وویل چې د دې سازمان پروژې شفافې نه دي
او له انکشافي اړخه متوازنې نه دي.
ښاغلي حنیف ټینګار وکړ چې د ملګرو ملتونو
دفترونه مکلف دي چې د خپلو فعالیتونو راپور بې له ځنډه د اقتصاد وزارت ته وسپاري.
په پروژو کې نامتوازن پرمختګ
دین محمد حنیف د ملګروملتونو له دفترونو سره د
تفاهم لیکونو د لاسلیک په ځنډ کې دلیل دا وباله چې پروژې د متوازن پرمختګ د اصل پر
بنسټ نه تطبیق کیږي، د هېواد د اساسي برخو اړتیاوې په پام کې نه نیول کیږي، او د دې
دفترونو معاشونه او لګښتونه لوړ دي.
په افغانستان کې د ملګرو ملتونو سازمان تر اوسه
د طالبانو د اقتصاد وزیر دې غوښتنې ته رسمي غبرګون نه دی ښودلی. مخکې له دې، نړیوالو
سازمانونو له دې شکایت کړی و چې د طالبانو چارواکي د بشري مرستو په وړاندې کولو او
د پروژو په تطبیق کې مداخله کوي.
په افغانستان کې د ملګرو ملتونو د بشري مرستو د همغږۍ دفتر د عقرب په لومړۍ نېټه اعلان وکړ چې په روان کال د سپټمبر میاشت کې د ۱۷۳ پیښو له امله ۸۳ د بشري مرستو پروژې لنډ مهالې ځنډول شوې دي. دې دفتر وویل چې د دې پېښو ۹۸ سلنه دلیل د طالبانو مداخله وه او دا پېښې د تېر کال په پرتله ۶۶ سلنه زیاتې شوې دي.
نظرات
ارسال یک نظر